أكيد بنسأل نفسنا كتير يعنى ايه هارد وير؟! ، وبيتكرر السؤال دا كل مانسمع كلمة سوفت وير او هارد وير الموضوع بسيط جدا لكن مهم بقدر كبير خصوصا ان عصب التطور فى الاجهزة الذكية حاليا بيحتاج يكون الشخص عندة مخزون ثقافى فى المجال دا.
مبدأيا أى جهاز زى ( الكمبيوتر ، الموبايل ، اجهزة الطباعة ... الخ ) بتجمع مابين السوفت وير و الهارد وير.
هناخد جهاز الكمبيوتر كمثال:
هنلاقى جهاز الكمبيوتر بيتكون من أجزاء مادية و ملموسة اى يمكن لمسها باليد زى ايه
- اللوحة الام او المازر بورد motherboard : دى اللوحة اللى بتوفر اماكن و توصيلات بحيث تجمع كل مكونات الهارد وير و تنظم العمليات مابينهم و تعتبر أكبر مكون من مكونات الهارد وير داخل الكمبيوتر ، تحتوى بداخلها كارت الصوت و كارت الشاشة و كارت الانترنت و منافذ لل Usb ، تحصل على التغذية الكهربية من الباور سبلاى.
- الهارد ديسك Hard Disk : دى الذاكرة الخاصة بالكمبيوتر او بمعنى اخر كارت ميمورى زى بتاع الموبايل بس على اكبر من خلال الهارد بنقدر نخزن كل اللى احنا عاوزينه من صور و فيديوهات و افلام و صوتيات و ملفات مكتوبة و كتب و حجات كتير و دا طبعا بيعتمد على مساحة الهارد سواء كانت 320 جيجا بايت او 500 جيجا بايت او 1 تيرا بايت ، بيكون له وصلتين ، الوصلة الاولى مسئولة عن التغذية الكهربية علشان يشتغل و بتكون متوصلة بالباور سبلاى ، و الوصلة التانية مسئولة عن نقل و تنظيم البيانات و الاوامر اللى بنحتاجها منه و بتكون متوصلة باللوحة الام.
- الباور سبلاى Power Supply : دا يعتبر مصدر التغذية الكهربية لكل مكونات الهارد وير فى الكمبيوتر و بيكون عبارة عن جهاز بيستقبل الكهرباء عن طريق كابل و يبدا ينظمها و يخرج فولتات مختلفة 3 فولت و 5 فولت و 9 فولت و 12 فولت على حسب المكون اللى هيغذيه ، جدير بالذكر ان المكون دا بيكون جواه "فيوز كهربى" بحيث لو حصل زيادة مفاجئة فى الكهرباء متأثرش على المكونات التانية.
- مشغل الاسطوانات DVD : دا يعتبر مكون ثانوى ليس من المكونات الاساسية ، بمعنى ان الجهاز ممكن يشتغل بدونه و لا يتأثر ، هو فقط نحتاجة فى حالة اذا اردنا تشغيل الاسطوانات او الاقراص المدمجة ، بيكون له وصلتين ، الوصلة الاولى مسئولة عن التغذية الكهربية و بتكون متوصلة بالباور سبلاى ، الوصلة الثانية مسئولة عن نقل البيانات و بتكون متوصلة باللوحة الام.
- المعالج processor : دا العقل الذكى فى جهاز الكمبيوتر ، أصغر مكون من مكونات الهارد وير و لكن يعتبر الاهم و مهمتة معالجة جميع البيانات اللى بندخلها من خلال الكيبورد او الماوس و كذلك البيانات اللى بتخرج على الشاشة. و كمثال على ذلك : لما نكتب كلمة عن طريق الكيبورد كملة "رادار" طبعا الكلمة بتظهر على الشاشة دا بيحصل ازاى !!! ، مكونات الهارد وير مبتتعاملش غير بلغة الالة و بالتالى دور المعالج هنا هو تحويل اللغة اللى ادخلنا بيها الكلمة الى لغة الالة علشان تظهر على الشاشة.
- الرامات او الذاكرة العشوائية RAM : دا الجزء المسئول عن تخزين البيانات و لكن لفترة مؤقتة ، بمجرد مانقوم بأغلاق جهاز الكمبيوتر بتتمسح كل البيانات المتخزنة بداخلها ، طب ايه فائدتها ؟!! الفائدة طبعا كبيرة لانها بتخزن نوعية البيانات اللى بتكون شغال عليها اثناء استخدامك للكمبيوتر فى كل جلسة و بالتالى كل ماتحتاجها اثناء الاستخدام خلال نفس الجلسة بتوصلها بسرعة كبيرة.
طالب بكلية الهندسة ، متخصص فى الهارد وير ومطور مواقع وباحث فى تحسين السيو ومتابع جيد للقنيات الحديثة ، نهدف إلى نشر ثقافة التعامل مع التكنولوجيا لدى العرب لتحقيق أقصى إستفادة منها
محول الاكواد محول الأكواد اضافة الإبتسمات اضافة الإبتسمات