السلام عليكم ورحمة الله وبركاته .. اعزائي القراء اهلا بكم في مدونتكم رادار
في الدرس ده ان شاء الله هنتكلم عن موضوع مهممممم بالنسبة لكتير منا وبنواجهه باستمرار في الحياة اليومية .
ازاي نحرق اي نظام تشغيل علي الفلاشة بدلا من استخدام السي دي والجو القديم ده ؟
اول حاجة عاوزين نعرف ان في برامج كتير جدا بتستخدم لحرق انظمة التشغيل ولكن للاسف بعضها غير كفء والبعض الاخر متخصص في حرق نظام تشغيل معين قد يكون اصدار معين من الويندوز زي ويندوز سفن او حتي قد يكون لنظام تشغيل بعينه زي البرامج الي بتحرق الويندوز بس والبرامج الي بتحرق لينكس بس وهكذا ..
البرنامج الي احنا هنتكلم عنه النهاردة هو برنامج متميز بحيث انه بيحرق اي نظام تشغيل ايا كان هو ايه سواء ويندوز او لينكس او ماك وكمان بيحرق اي اسطوانات ليها ملفات BOOT علي سبيل المثال اسطوانة هرنز .
اسم البرنامج هو Universal USB Installer او كاختصار هنلاقيه دايما UUI .
اول حاجة خلونا نبدا مع بعض نحمل البرنامج والجميل ان البرنامج مجاني لانه مفتوح المصدر لانه اصلا من انتاج مطوري Linux
حمل البرنامج من الموقع ده
بعد ماتدخل الموقع انزل تحت شوية لحد ماتوصل لكلمة الداونلود الي هتلاقيني عامل عليها تظليل باللون الفوشية ده في الصورة دي .
بعد ماتضغط داونلود احفظ بقا البرنامج في اي مكان انت عاوزه وتعالي بقا نشوف هنعمل ايه .
لما تيجي تفتح البرنامج هيطلعلك رسالة بيطلب منك انه يستخدم الـ Administrator قوله Yes مفيش مشاكل وبعدين هتلاقي الفورم دي فتحتلك بالشكل ده كده .
طبعا النافذة دي فيها شروط الاستخدام وحقوق الملكية والذي منه ممكن لو عندك وقت تقرا الكلام ده ولو مش عندك وقت كبر ودوس I Agree وكله علي الله .
هيظهرلك بعد كده النافذة دي الي فيها 3 خطوات كل خطوة بتشتغل بعد ما تخلص الخطوة الي قبلها وهتلاقيني معلمهوملك ب 3 الوان مختلفين في الصورة دي كداهو
الخطوة الاولي الي متعلمة باللون الاحمر دي اختيار نوع نظام التشغيل او ملف الايزو الي انت عاوز تحرقه علي الفلاشة وهتلاقي قايمة كبيرة جدا فيها اصدارات كتيرة جدا لانظمة التشغيل هتلاقي فيها كل اصدارات لينكس لان ده طبيعي بحيث ان البرنامج من تطويرهم اصلا وده تحت حاجة اسمها Linux وحاجات تانية بقا زي اسطوانة Hiren's و Falcon بالاضافة الي انظمة تشغيل الويندوز زي ويندوز 7 و 8 والكلام ده والحاجات دي تحت حاجة اسمها NON - Linux.
المهم احنا هننزل تحت خالص في نهاية القايمة ونختار Windows 7 Installer بحيث ان احنا هنحرق في الدرس ده ويندوز سفن علي سبيل المثال علي اساس ان اغلب الناس بيستخدمو ويندوز 7 وبعدين اي حد بقا عاوز يحرق اي اصدار تاني هيتبع نفس الاسلوب بالظبط مع اختياره للاصدار الي هو بيستخدمه من القايمة .
قولنا نيجي تحت في القايمة ونختار ويندوز 7 زي في الصورة كده
هنلاقي بقا ان الخطوة التانية بدأت تتفعل تلقائيا اول ما اخترت نظام التشغيل الي انا عاوزه .. في الخطوة دي بقا هنحددله مكان ملف الايزو بتاع الويندوز او نظام التشغيل الي انا هحرقه علي الفلاشة (طبعا الكلام ده كله وانا حاطط الفلاشة في الجهاز يعني :v )
هتشوف بقا انت حاطط ملف الايزو فين علي جهازك وتختاره زي مانا هعمل كده في الصورة دي .
انا عندي مثلا الايزو محطوط في الامتداد ده ودوست عليه واختارت Open
لو ملف الايزو بتاعك سليم وميه ميه هتلاقيه اتحط عادي وبقا لونه اخضر كده زي في الصورة اللي عليه مربع اصفر ده وكمان هتلاقي الخطوة التالتة اشتغلت تلقائيا برضه .
الخطوة التالتة بقا واخر خطوة دي الي هتخار فيها الفلاشاية الي هتحرق عليها الويندوز هتلاقي عندك في الصورة الجاية دي الفلاشة بتاعتي الحرف بتاعها F واسمها UUI شوف بقا انت فلاشتك اسمها ايه وكده واختارها .
بعد ماتختارها هتلاقي ظهرلك اوبشن جديد جنبها اسمه Format علم صح عليه
تمام دلوقتي كل شئ بقا زي الفل كل الي عليك بقا انك تدوس Create وهيظهرلك قايمة كده فيها بعض التعليمات فكك منه وقوله Yes بس وتسيبه بقا يحمل مع نفسه خااااااااالص وغالبا بياخد وقت من 10 الي 20 دقيقة حسب امكانيات جهازك.
ده هيبقي منظره وهو بيحمل عشان متتخضش
سيبه يعيش بقا ولما يحلص بالسلامة هيجيبلك الرسالة دهين بيقولك انا خلصت وكل حاجة بقت تمام
دوس بقا Close ومبروك عليك الويندوز الجديد .
اتمني يكون الشرح سلس وسهل وعارف اني بطول في الشرح بس انا بحب اقول كل حاجة بالتفصيل واتمني من ربنا انه يوفقني لافادة حضراتكم .. تابعو مدونتنا لكل جديد والسلام عليكم ورحمة الله وبركاته
محول الاكواد محول الأكواد اضافة الإبتسمات اضافة الإبتسمات